Beiträge von Squeezie

Neinei, ich han diräkt A beschränkt gmacht. Han döt eifach ä 250er gmietet gha. Vu däm här isch klar, dassi di gross überchum. Vorussgsetzt ebe ich "bestah die Probezit". Nimmt mi halt ebe scho no Wunder wie viel, dass drinligä wüär...

Hmm, de Titel tönt ja wohl chli idiotisch:
"Was muess mer mache zum di offe Prüäfig nöd übercho nach 2jähriger Probezit?"

Ich ha natürli nöd gmeint "hmm, was muessi mache, damiti nachher nöd so geili Töff fahre därf, will ich das uf kän Fall wett".

Nei, ich han sit 1.5 Jahr A-, sprich imene halbe Jahr sötti de gross Uswis prüäfigsfrei übercho.

Jetz heissts ja vu de offizielle Site, dass das e prüäfigszit isch, wommer bestaht falls mer "nöd allzu schwär gäge s Gsetz verstosst".

Hät öpper konkret eh Ahnig, wie viel dass mer sich erlaube därf?

Ich hoff ja nöd, dass nach 1 oder 2 "chlinere" Tempoüberschritige scho Schluss isch.

En mech hät zwar mal gmeint, mer müäss vermuetli voll bsoffe mitemene hunderter über es Rotliecht fahre innerorts, isch sich aber au nöd würkli sicher gsi.

Bsoffe fahre und innerorts z schnäll si isch für mich keis Thema. Ha högstens Angst wäg Tempoüberschrittige usserorts und inkorrektem Fahrzügzuestand (so vu wäge Lärm- und Abgasvorschrifte).

Ich wett ebe uf kän Fall, nachher d Prüäfig nachem neue System (3 Jahr uf Bewährig) mache .

PS: Bis jetz hani no e lupereini Weste, ich hoff natürli au, dasses so blibt, aber ich ha dänkt, ich tue mi vorsichtshalber scho mal informiere

Merci jungs (und natürli Mädel )!

jaja ich ha mer müeh geh

Hämmer d i däm Fall viel Informatiker?

Sali zäme!

Ich bi letschtin dur en Kolleg uf die Site cho und chan eu bis jetz würkli nur lobe: Isch ächt fridlich da. Vor allem schint das mal es Forum z si wo nöd jede s Gfühl hät, er seg de geilst und muess all andere färtig mache.

Ja, also zu mir als Person:

Ich bi 20i und studiere Informatik. Hobbies (näbed em Töfffahre) sind Sport, vor allem Fuessball, Usgang und Penne.

Zu mir als Töffahrer:

Ursprünglich agfange hät das bi mir au mal mitemene 50ccm-Roller (Italjet Formula 50 Air). Dänn häts leider mal wieder rächtlichi Problem ge hät. Sprich: Ich ha mit 18i de Roller ufgmacht und binen ga vorfüehre. Da isch usecho, dass mer das bi däm Modäll i dä Schwiz gar nöd därf, was de Mech ebe au nöd gwüsst hät. De Mech hät mer dänn däfür sehr ä fairs Agebot füren 125er-Roller (Piaggio Skipper LX 125) gmacht (gschalteti Maschine häter ebe nöd gha). Ich ha dänn di Praktisch 34PS-Prüäfig gmacht, und zwar ufemene 250ccm-Roller.
Ich persönlich find abär, dass ich au dadämit mal wieder Sicherheitslückene i eusem System ufzeigt ha: Da hani mitemene 250ccm-"Sofa" d Prüäfig gmacht, wo chum vum Fläck cho isch, und 2 Jahr später chani prüäfigsfrei all Maschine (au di gschaltete) fahre. Ich weiss ja nöd, wie ihr das gsehnd, aber ich find au de Diräktistig ab 25i ä Idiotie.
Da mis Härz insgeheim scho immer viel meh für gschalteti Maschine als für Roller gschlage hät, hani mer änds letscht Saison en Chindertraum erfüllt und mini RS kauft.

Mini Maschine:

[Blockierte Grafik: http://goldwing.bikepics.net/aprilia-rs125-98-bikepics-063417.jpg]

***Aprilia RS 125 Rossi Edition, Jg. 1998***

Ha si occasion kauft mit 8000 km ufem Buckel.

Tuning: Rännuspuff, Rännvergaser, optimierti offeni CDI, anderi Chette (chürzer übersetzt)

Leistig: offe hät si 30 PS lut Härsteller, dank Tuning no chli meh.

Klar: E bekannts Vorurteil zu däre Maschine isch, dass si relativ viel bim Mech stöchi. Bis jetz bini zum Glück no dävo verschont blibe, ich stell mi aber finanziell mal da druf i...

Töfflichi Zuekunft:

Imene halbe Jahr chumi di gross Prüäfig gschänkt über (em neue System seg dankt a däre Stell). Vorussichtlich stigi aber nonig grad um, will i einersits no huere Freud a minere Aprilia ha und anderersits als Studänt nöd so würkli vermögend bi. Min Traum als nägschti Maschine isch e gäli Suzuki GSX-R 600.

Ja das wärs eigetli, merci vielmal fürs ufneh i däm Vorum, ich hoff mer gseht sich mal uf dä Strass oder inere Beiz!

Nei, ich ha ächt namal voll d Theorie müässe mache, nach nur 4 Mönet (ebe, wännd en praktische Uswis (z. B. Auto) häsch) muesch das natürli nöd. Dä uswis hani ebe überhaupt nöd verlängere chöne und für en neue bruchts ohni e praktischi im Sack, halt wieder e Theoriprüäfig.

S hät mi natürli scho voll agschisse, ich bi däfür eifach mit de 125er bim Strasseverchehrsamt anegfahre zum di Theoretisch mache. Isch a no e lustigs Gfühl gsi.

Vilicht hät aber au eifach s Strasseverchehrsamt wider mal überhaupt kei Ahnig gha.

Ich glaub, ich sött mal en Thread ufmache nur zum Thema: "Fähler vum Strasseverchehrsamt". Nur ein Uszug da mal. Letschti bini mitere Kollegin ga usfahre wo e Yamaha RD 125 occasion kauft hät, zum Strassi gfahre isch, de Fahrzüguswis highebt hät und gmeint, si het gärn de zuäghörig Lärnfahruswis. D RD hät 17.5 kw (cli über 20 PS) und die händere tatsächlich de Uswis für bis 15 PS ge

ok, viel witeri lustigi Gschichte vum Strasseverchehrsamt Winterthur folged...

LOL, klar, isch au guet!

Findi ämmel voll i. O. dass ihr eu da nöd vu eus, em Nachwuchs dinstanziere wänd! Ich ha natürli anderersits au nüt gäg di grosse Maschine

Moin,

genau da bini ebe a mal voll dri gloffe. Da hät mer lut Lernfahruswis bis im Februar zit, findet aber kän Kurs im Winter. S Strasseverchehrsamt chunt natürli nöd uf d Idee, dass mer die Zit bis zum Kurs über de Winter verlängere chönt und drum hät mer halt wämmer de Lernfahruswis änds Saison holt fasch gar kei Zit zum an Kurs ga.

Wür mi aber no gnau informiere: Ich han nämli (leider ersch z spat) ghört, dass es gwüssi Fahrlehrer git wo offebar tatsächli im Winter Kürs mached. Bi aber nüm ganz sicher.

Zämmegfasst isch das ja mal wieder e rieseidiotie: Äntwäder hät mer eifach chum Zit zum de Kurs mache oder wird (falls würkli möglich) zwunge de Kurs im Winter bi allefalls Glattis zmache und d Gsundheit und de gliebt Töff z riskiere.

PS: Falls i däne 4 Mönet halt nöd an Kurs chasch, musch d Theorieprüäfig namal mache (es seg dänn du häsch scho di praktisch auto). Hani leider au praktisch usegfunde...

Kei Ursach,

sali Pseudonat, merci für di fründlich Begrüässig. Klar, mir 125er müänd doch schliesslich zämehebe! Wie isch dänn da d Verträtig vu de 125er so i däm Forum? Gits ämmel au 125er-Träffe vu da us? Oder müässt mer da mal sälber öppis organisiere?

@TS: Ich dänk, e TZR isch uf jede Fall ideal für das wo du wetsch!

Sali zäme,

Cool, da tritt ich neu däm Forum bi und find scho e Frag über d RS.

Ich ha mer au eini zuetah vor churzem. Ha, woni mi drüber informiert ha, au überall ghört gha, dass si halt numal öfters bim Mech staht als anderi 125er (isch ja leider allgemein bekannt). Ha mer dänn aber gseit, das ischs mer wärt, will eifach s Design und d Leistig eifach hammer sind für ä 125er (isch ebe scho di einzig 125er (näbe de Mito natürli...) wo das bütet). Han dänn e guets Agebot gfunde: en ufgmotzti wo ersch 8000 km druf gha hät.

Falls där e RS chaufsch wür i scho eher vunere ältere abrate: Lut Handbuech sött mer de 1. Cholbewächsel scho nach 14000 km mache! (binere DT zum Verglich ersch öppe bi de 4fache Distanz).
Ich wür aber au uf kän Fall e original neui 15 PS-Version chaufe. Isch eifach zu viel Leistigsverlust gägenüber de offene (ich bi nu mal eini gfahre mit original ca. 24 PS, scho die isch viel langsamer gsi). Aber ich glaub mer chunt si zum Teil neu über als 30 PS-Version (A beschränkt).

Vu de Instabilitäte bi höchere Gschwindigkeite hani bis jetzt no nüt gmärt, bi aber au ersch bis knapp über 140 lut Tache. Fühl mi döt ämmel no viel wohler als bimene Lappe uf mim 125er-Roller.

Höchstgschwindigkeit: Mit Bifahrer gradus (nöd bergab) schafft si lut Vorbsitzer 160 ufem Tacho, obwohl si chüzer übersetzt isch! Ich wierd sälber mal nägstens teste, was si ohni Sozius so anebringt.

Falls der d Leistig nöd so wichtig isch, würi scho au eher zunere NSR oder so rate.

Und falls doch ä RS nimmsch: Nimms der z Härze si zersch izfahre und ersch drucke wänn de Motor ämmel warm isch. Si wirds der danke!

So, ich hoff, ich ha der chli chöne hälfe (wänni au eigetli nu namal s glich gseit ha wi all andere da )

Ich han bis jetz no kei Problem gha und hoff mal s gat so witer. Han aber leider au ersch 1500 km zrugggleit.