So, ich find es isch a dä Zit, dass au ich mal min Sänf zum Ghostrider abgib:
Ich han all movies vu ihm (nöd kauft...), wür aber sicherlich nöd säge, dass ich än vergöttere oder verehre. Aber eis muemmer em sicher geh: fahre chaner! Äs isch ja schliesslich nöd nur so, dass er eifach gradus mal ebe gas git. Er häts sicherlich au bi höche Gschwindigkeite sehr guet im Fass, dä Autos uszwiche. Ich dänk das isch gnau das wo vieli Lüt eifach a ihm fasziniert: Er fahrt nöd "eifach nur" uf dä Rännstrecki umenand, sondern im Verchehr. Drum isch einersits viel meh "Action" z gseh, anderersits gseht mer so dä Verglich zu dä normale legale Gschwindigkeite. Äs Moto-GP-Ränne chamer ja immer im Färnseh aluege.
Im 3. Film gseht mer en übrigens mal z Dütschland uf dä Rännstrecki: da gseht mer, dass er au das absolut im Griff hät. Trotzdäm dänki nöd, dass er uf dä Rännstrecki mit dä Profis mithebe chönt. Er hät halt sis eigene Spezialgebiet (Verchehr uswiche etc.). Däfür chämt em en Rossi wohl uf de öffentlichi Strasse au nöd na (ich hoff, es chunt nie däzue...).
Das mit dä 450 km/h glaub ich persönlich. Lut sine Ussage (Spiegel TV Reportage) hät er am Hinterrad 499 PS. Topspeed seg maximal über 450, das aber nur mit dä Verschalig. So wiemeren ämmel i de bakannte Videos gseht, woner di ganz Verschalig weg hät, segeds no 370.
Dass es Formel 1 Auto nöd so schnäll fahrt, isch relativ eifach z erchlähre: 1. Händs au Beschränkige i dä Reglemänt, 2. Gits kei Strecki wos das jemals usnutze chöntet, also legeds logischerwis all Abstimmigä druf us, ä gueti Beschlünigung i däne Gschwindigkeitsbereich z ha wos es au nutze chönd. Het ä Formel 1- Strecki ä 10 km langi Gradi, würi das ganzi sicherlich scho wesentlich andersch usgseh.
I eim Movie gseht mer de Tacho vunere 1000er-Gixxer. Wo de 300 azeigt, zieht de Ghostrider uf äm Hinderredli verbi. Die 320 därftet also durchus realistisch si (ich dänkt sogar äs sind no chli meh). Zum dä Rekord bräche müässti er das ganzi ja offebar ein Kilometer ushalte. Machemer chli Mathe:
320 km/h = 320 / 3.6 m/s = 89 m/s
--> er müässt rund 12 Sekunde im Wheelie verblibe. Im Movie bini leider nie über 8 Sekunde cho bim mitstoppe, mer gsehts aber meistens au nur sehr schlächt. Ich persönlich traus em durchus zue, dassers schaffe wüär.
Zum Heikle am Thema: Söll mer das ganze jetz geil oder chrank finde? Mini Meinig:
Fasziniert häts mi ehrlich gseit scho, woni die Ufnahme s erst mal gseh han. Aber rächtfertige chanis absolut nöd. Dä -=TS=- hät sicherlich rächt: mitemene Auto chamer meh zerstöre als mitemene Töff. Trotzdäm isch das wonär macht brutal gfährlich. Däzue no äs Zitat: "Verletzti hegs bis jetz no nie geh, mindistäns z Schwede nöd..." Ich dänk es isch so ähnlich wie mit Downloads: Vieli vu eus laded alles möglich illegal abe (isch nu mal so ä Vermuetig...), däbi weiss doch jede gnau, dassäs Diebstahl isch. Di meiste versuecheds nöd z rächtfärtige (und chönds au nöd), es isch halt eifach praktisch und gat schnäll. Bim Ghostrider gsehts halt eifach arschgeil us...
Mittlerwile bin ich persönlich meh begeisteret vumene Chris Pfeiffer wo absolut legal zeiged, was ufeme Töff alles möglich isch. Im Gägesatz zum Ghostrider wo als Wahnsinnige überechunt und am Image vu de Töfffahrer eher schadet, stelled so Stunt Rider wi dä Pfeiffer Töff fahre als ä Kunst dar, wo au vu Fraue (sorry, isch absolut nöd sexistisch gmeint 
) und sogar vu chline Chind bestuhnt wärde chan.
So, merci vielmal a all wo sich die Zit gnah händ min Ufsatz z läse!
Ich bi absolut offe für Kritik zu minere Meinig!
). Ebe Bergafahre chönt a no cho.
