Review: Action HD Video Kamera MEDION® LIFE® inkl. Videos

Sooodele, hallo zäme

Ech han mol es paar vo euch versproche, dass ech es Review vo de sehr erschwingleche Action-Cam won ech kauft han werde do inestelle. Hed zwar echli duured well ech mech zerscht mol echli han mösse rechtig met dem Ding usenand setzte... aber besser spät als nie

Han jetzt Ferie gha ond entsprächend echli chönne go cruise ond au mol ersti Erfahrige im Video schniide dörfe sammle

Grundsätzlech gods om das Ding do Action HD Video Kamera MEDION® LIFE®

Was es dezue z säge ged, wo die neu usecho esch hed d Medion en Aktion gha wo mer sii kurzi Ziit för CHF 79.- becho hed (+ 10.- Lieferkoste).

Zum Lieferumfang:

Grundsätzlech muesi säge, dass mer för dä Priis i dem Bereich nüd chan bemängle.

Halterige:

Es ged 2x en Grundfuess mit Klebehalterig (so eine hani am Helm, absolut i.O.), 1x en Halterig metemene verstellbare Bändeli (nonig verwändet) ond en Halterig wo mer z.B. am Lenker chan festklemme (total unbruchbar uf Grund vo de Vibratione wo de Lenker wiiterged, zumindest be minnere Maschine). D Cam sälber schrubt mer imene Adapter fest (kei Werkzüg nötig) wo beweglech esch ond im jewilige Adapter chan i-klickt wärde.

Cam:

D Cam sälber esch sehr chlii ond kompakt, also das wommer suecht. Sie werd mitere 2GB Micro SD (inkl. SD Adapter) glefered was be 30 FPS (mer chönnt au uf 60 omstelle) för knapp 1h Film wörd länge. Do de Akku aber guet 2h bis sogar 2,5h länged han ech mer en 16 GB Karte inkl. USB-Leser fär 25.- be Digitec bsorgt. Ansonste vo de Bedienig här absolut selbsterklärend... hed genau 2 Knöpf... 1 zom iischalte ond 1 zom Ufnahm starte.

Zudem esch d Cam metere Vibra-Funktion usgstattet, wommer locker au döre Helm/Händsche/What-ever gspört. So merkt mer also au währed de Fahrt ob d Cam jetzt ih-/usgschaltet bzw. d Ufnahm gstartet/stoppt hed.

Zuesätzlech geds natürlech nochli Software (för Katz) ond es aständigs Micro-Faser-Säckli. S USB Kabel wos dezue ged esch zom Uflade (Stromadapter inkl.) ond a PC hänke, was es do z erwähne ged esch, dass es wenn mer d Cam direkt ahänkt ned möglech esch d Files z lösche, för das mues mer ufe Card-Reader oder en ned enthaltene USB Adapter zrugg griffe (geds be Digitec gueti Bundles mit Micro-SD).

Ufnahme-Qualität:

Finde, dass es do grundsätzlech nüd z bemängle ged...wenn mer de Priis bedänkt. D Cam zeichned mit 720p (sprich HDready) uf ond lefered vode Farbquali här au es ansehnlechs Ergäbnis. Wo d Cam echli müeh hed esch de raschi Hell/Dunkel-Wächsel, also wenn mer z.B. ine Tunnel ine oder use fahrt (siehe Movies), was ech aber ned als extrem störend empfinde.

Sound:

Do esch d Cam werklech miserabel. Also wer sech öberleid die Cam zuezlegge dörf uf kei Fall erwarte, dass er s schöne kernige Gehüüle vo sim Motor nocher im Video chan entnäh. 1. esch de Sound total liislig ond 2. ghört mer praktisch nome s rusche vom Wind... esch au de Grund worom mini Videos mit ere andere... ähm... pushende Soundkulisse unterleid sind

Support/Extras:

Also Support sitens Medion müend er ned erwarte. Ond bis dato geds au kei Extras wommer sech chan dezue poste. Han ei Klebehalterig gschlisse (min Fehler) ond mol be de Medion aglüte ob mer die au einzeln chan kaufe... god ned. Sprich mer zahlt de Priis för es Komplettpaket ond chan d Cam ned erwitere oder upgrade.

Ergebnis:

Mer chan no lang mis BlaBla döreläse ond sech debii dänke was mer wet... aber was zählt send Ergebnis. Dorom han ech mol zwe förs Internet tauglechi Videos zämegschnitte ond uf Youtube gupped. (Leider heds s einte Video liecht Quali iibüesst dörs Formatiere, Schniide ond Uploade)

Grimsel

Susten

Fazit:

Aaalso, wenn ech bedänke, dass mech dä ganz Spass 89.- bzw. inkl. 16GB Micro-SD grad emol 114.- (do esch d Buess woni ufe Grimsel gfassed han höcher gsii ) kostet hed ben ech ned nor zfride sondern sogar begeisteret. Es chond halt ned ganz ad Quali vonere GoProHD äne, kostet jedoch au nur 1/3 bis 1/4 vonere GP inkl. Halterige ond Zubehör.

Fende d Medion bietet do es guets Priis/Leistigs-Verhältnis för es aständigs Produkt... don't expect highest Quality for low prices

Soo hoffe, dass das Review vellech em einte oder andere öpis bringt oder dass er wenigstens echli Spass a de Movies hend

Lg

Andi

pzero: Nope, esch zwe Täg später gsii wos mi ufem Grimsel obe gnoh gha hed

@Effe: Jo ben scho mol go google wäg dem ond dete send au so Tipps met Schumstoff oder Tüechli öber s Micro kläbe gstande... nor ergendwie benn ech z Dumm d Micro-Öffnig a dere Cam z gfinde

@Effe: So han Title uf YT jetzt echli apasst... hesch recht - Bem Susten-Run hani de Töff jo em Vorspann erwähnt... bem Grimsel hani för das kei Bock me gha, well dete hani so vell ned Internettauglechi Stelle mösse useschniide (Blick ufe Tacho und anderes ) hani kei Bock me gha grossartig Vorspann und Abspann z mache

Beni: Ob de Mehrpiis grächtfertigt esch esch froglech... dänke chond emmer drufa för was es bruchsch. En GoPro esch z.B. för öper wo ne voll anderi Sportarte, won er wot Filme, macht secher die besseri Wahl wells eifach Zuebehör ohne Ende ged ond ech dänke wohrschiinlech hed sie au die besser Lebensduur. Well be de Medion chasch z.B. de Akku au ned wächsle... sprich wenn dä noch dene 2 Jahr Garantie im Arsch esch... neui Cam.

Jo ech luege obi das metm Mic modifiziere mol he bechome ond wörd denn öpis uppe för dech zom luege.

Betr. Akku ond Speicherkarte hani eigentlech zwar scho alles gschrebe... aber do nomol schnell en zämefassig. De Akku hebt öppe 2-2,5h... sprich GoPro Niveau... met de 16GB Karte woni kauft han brengsch öppe 3-4 Akkuladige druuf. Es länged also au för en 3-4 Tägigi Reis... wenn mer s Ufladekabel mitnimmt

Also mer gseds scho guet, dassi Cam am Helm han... siehe Bild unne - Aber semmer ehrlech... das cha dene doch egal sii... höt zo Tags hed jo vo 5 Töfffahrer 1 en Cam montiert... ond ohni richterleche Beschluss wörd ech dene gar nüd zeige au wenns es wörded fordere. Aber es empfehlt sech halt denn nome "bereinigti" Videos is Netz z stelle

Ob du 4x so vell wetsch Zahle esch der öberloh... wenns nor zom pläuschle esch länged minere Meinig no d Medion... em Winter werdi si denn au mol bem Boarde teste... well sie esch Wasser... zumindest sprützwasserdicht - Wenn d Cam jedoch ned am Helm wotsch... ond au nüd fix uf dim Töff wetsch akläbe (das wet ech äbe ned) denn dörfsch si au ned kaufe

Soo hoffe han kei Frog öbersehe

@Effe: Ah jo betr. dim YT Comment... ech sueche sälber grad no nochere Lösig wie ni das Ding mol au am Moped sälber chan befestige... äbe au wägem Kurve-Feeling. S Problem esch so en Klebehalterig chond mer ned uf mis Baby ond d Lenkerklemme chasch äbe wäg de Vibratione vergässe - Ech werde als nöchst mol versueche obi si ergendwie schlau chan uf min neu erstandene Tankrucksack chan verankere om mol en neui Perspektive z becho