Unfall am Fritig- Pfupfi (schwer) verletzt, witeri Zuekunft ungwüss;-(

Liebi Lütlis vom Forum

So wis usgseht, isch mini Töff-Karriere am Fritig beändet worde Ich bi am Bode zerstörrt und mälde mich jez drumm namal, damit ihr bscheid wüssed, was los isch, falls ich mich zuekünftig gar nümm wird im forum mälde.

Am Fritig isch mr z'Wetzikä eini ih mis Pfupfi iegfahre ;( äs isch stockende Verchehr gsi, ich bi grad ufm heiwäg vomene chliine tüürli gsi... ja, da isch sie mr hine iegfahre

Ufdä erschti blick, womr dänn näbed use gfahre sind, häts gar nöd schlimm usgseh, im gägeteil, ich ha gmeint, seg nur das teil wo s'nummero-schild dra isch, ihdruckt bis an pneu. Hani das wider zrugg boge und ebe...susch keis Chratzi dra gha.

Bi dänn sicherheitshalber doch na rasch bi mim mech verbi,und hanen bätte, mis meitli gnauer ahzluege.....er hät dänn festgstellt, dass's durdä uffahrunfall s'ganze Heck vode Pfupfi uf links verboge hät.

Hätmr under dä hinder Fänder, zwüsched pneu und fänder glanged, hätmer ufdä rächte site na ca. 1 finger drunder bracht und ufdä linke site gueti 3 finger.... Gnauer häter's nümm ahgluegt, da's doch grad vill lüt ume gha hät, woner auna hät müsse luege.

er hätmr dänn aber gseit, dass das jez ä grösseri gschicht chönnt gäh, will

1. äs seg än 23 jährige Töff, wo ich da heg, wo villicht na än Marktwärtvo 500.- hät. Wänn d'reparatur tüürer wird, waser befürchtet, chas guet si, dass mir d'versicherig vodä andere, wo mir hine ie isch eifach na dä wärt vom töff uszahlt und sich cha weigere, d'reparaturchöschte z'übernäh, will's sich bi somene alte töff eifach nümm lohnt. und

2. wills än 23 jährige töff isch, wo nümm härgstellt wird ect. däfftis schier nöd möglich si, di benötigte ersatzteili für mis meitli z'finde.

3. chas si, dass dä versicherig wird probiere dä töff z'verchaufe, um na möglichscht vill gäld usezholle, und mir dass dänn uszahlt.

Ich ha mis meitschi dänn namal heignoh, alles bidä andere gmälded, wis usgseht. Die hät nur gmeint "Ja, aber isch ja nüt kaputt, chasch ja trotzdämm na umefahre...!" natürli, willmr die frau nöd würkli kompetäntüberecho isch, hani dä unfall dänn grad sälber bidä versicherig vo ihre gmäldet.

Ja, jez hani mis meitli geschter morge definitiv zum mech bracht, damiter sie gnau cha ahluege und dänn dä Schadensexperte vode versicherig cha verbi cho. Ich ha am Mech d'Chaufquittig + d'Rächnig auna gäh, damit dä Experte gseht, dasi insgesamt ca. 3000.- investiert ha.

Ich ha am mech auna gseit, dases mir jez unmöglich wär, än neue Töff z'chaufe. Er söll sich bitte für mich ihsetzte, dass ich über 2 jahr nach dämm Töff gsuecht heg und mis meitli än ganz grosse emotionale Wärtfür mich heg, dasi umbedingt möcht, dass sie repariert wird und ich wider gnau dä glich Töff ha, wieni vorem Unfall gha ha. Dä mech hätmr versproche, sis beschte z'gäh, aber verspräche chönner mr natürli nüt.

Jez gaht s'grosse Hoffe und bange los ;(s'gahtmr abartig scheisse, s'chotzt mi eifach nur ah, will ja, ich dänke chum, dasi mis Pfupfi wider im gliche zuestand bechume, wie sie vorem unfall gsi isch. Falls die d'reparatur würkli nöd söttet zalle, chani mi erschtmal vom Töff fahre verabschide bzw. weiss gar nöd obi dänn je wider bock druff ha, wänni weiss, dass'd wännd chli än eltere Töff häsch, dä eh grad muesch schmeisse, wänndr sone blödi chueh hine iefahrt. Uf so was hani ächt keis 2. mal Luscht. Vor allem dass sonen huere scheiss gnau jez muss passiere, woni mis meitli langsam im griff ha, weiss woni muess binnere luege ect. Gnau dänn, woni richtig freud annere becho ha, s'wätter tip top isch und dä fründ sich äxtra au än Töff kauft hät, damit mr zämme chönnd go fahre, wirdmr mis meitli wägnoh
;(

lg

Hey Lüt

Danke für eui ehrliche Antworte.

Klar bini neumet dure froh, isch mir nüt passiert, aber zur ziit wottis eifach nani wahr ha, was da scho vill vermuetet, nämmli dass mini Meitä im Arsch isch Chasmr eifach nöd vorstelle, dass sonen chline, "harmlose" Stupser s'Aus füren Töff cha bedüte ;(

Vorläufig wirdi nöd nacheme neue Töff umeluege. Wott zersch dä Bricht vom Mech und dä Versicherig abwarte.
Ich hamr au überleit, fallsmr d'versicherig nurna dä wärt vomm Töff uszahlt, mr dä schade aber wider vollständig repariere chönnt, dasi dänn halt evt. mis Spaarbüechli gah go plündere Natürli nur wänn s'risiko vollständig usgschlosse isch, dass ufgrund vo dämm Unfall na irgend äs rescht-risiko da isch, dass was chönnt passiere.

s'Problem isch halt au, dasi na dä 3. Grundkurs teil vor mir ha und d'Prüefig bis im Novämber mache muess. Und die zwei Sache wotti eifach nöd miteme Miettöff oder emene neue Chopper müsse go mache, woni mi nöd/nani wohl fühl druff ect.

Und klar gits na ganz vill schöni und tolli Töff uf däre Wält, aber ich chami nöd dämit abfinde, dasi mis Pfupfi nani mal äs Jahr ha und sie scho däff wägschmeisse ;( Mitem Töff fahre wotti eigentli nöd ufhöre (bi nachem Unfall ja na id Garage und hei gfahre und ha kei angscht gha, dass nama was chönnt passiere, im Gägeteil, fühlmi langsam zu 150% sicher uf mim Meitli..), aber ich wüsst jez nöd, obi eifach chönnt losgah, än neue töff holä und ad prüefig... so wie ich mich känne, wür dä Uswis dänn eifach ablaufe, will dä Ahschiss z'gross isch und d'Motivation zum Witermache fählt :pinch: Oder ich ghör zu däre Fraue-Sorte, wo eifach zu allem ä emotionali Bindig ufbaut...

Und s'doofe isch halt au, theoretisch hetti s'Gäld für än neue töff bzw. än Occassion. Ich wott das Gäld aber nöd bruche, will's bi mir ändi Jahr än Hund git und ich für dä wott Gäld uf d'Siite tue bzw. dasi 3-4 Mönet cha frei näh, um dä Hund ihzwönne und eifach mitem chönne die Ziit z'verbinge, wo wichtig isch, um ä gueti Bindig ufzbaue ect.
Somit stah ich sehrwahrschinli dänn eh vor dä Entscheidig: Töff oder Hund. Hetti mis Pfupfi na, hetti das dänn eifach ä längeri Winterpause, aber söttis tatsächli so si, dasi sie cha wägrüere, wird mini Entscheidig bim Hund si, will dä scho sit über eim Jahr plant isch, daser chunnt und das wär eifach nöd fair, wänn er wägem Töff müsst zrugg stecke. Und klar würs weh tue, uf's Töff fahre z'verzichte, villmeh würs mr aber na weh tue, uf dä Hund müsse z'verzichte...vo dämm här wär dä Fall dä klar... ussert s'git na än Lottogwünn :pinch:

Aber mr sött ja dä Tüüfel nöd immer grad ad Wand maale und somit probieris jez eifach s'vorzue z'näh und ma gucke, was jez uf mi zuechunnt

lg

Danke Sara, ich hoffe au, dass alles wider guet wird....:-(

Hey Zämme

Gueti Nachrichte!!! DäSchadensexperte hät mr hüt ahglüte: Mis Pfupfi wird gflickt!!! Äs gäb zwar würkli kei Ersatzteili meh, aber dä mech probiert jez dä hinder Fänder wider zrächt z'büge und wägem nummereliechtli und was susch na kaputt gange isch, wirder sich was ihfalle lah bzw. was zämmeschweisse!

Ich bi mega happy Dä Experte hät zwar gmeint, mr chönns theoretisch scho als Totalschade ahmälde, aber er dänkt nöd, dasi für 1500.- än neue Occassion finde. Und abgseh dävo lihts au ih ihrem Inträsse, dass d'Fahrzüg wänn möglich wider repariert wärded...irgendwie so

Juhuiiiiii Namal danke für eui Hilf, ich phalte eu ufem laufende

Zitat von rude

Hey super freut mi für di und dis Pfupfi.

Hätis nid dänkt, aber isch jo toll eso! :thumbup:

De hoffe das d Reperatur schnäll goht und de gli wieder underwägs bisch.

Hey Rude

Ja, hetti au nümm dämit grächnet, isch dä Hammer, dasi sie wider überchume

Hehe ja das hoffi au, wobi ich lah sie grad dete, dass's dä Service grad auna chönnd mache, aber dänke, i 1, höchschtens 2 wuche hani sie sicher wider Dä cha Töffsaison für eus zwei definitiv (wider) losgah!