alles relativ

Zitat

Original von DeepZone: ( ... ) schneller (gemeint ist: schneller als 85 km/h / Anmerkung von TT) be ech nor of de Autobahn.. ond naja ech hoffe det werd ech nie e Vollbrämsig erläbe, will go üebe cha ech die jo schlächt

Chunnt druf aa, wieviel Gsetz du für dini Sicherheit bräche willsch. Ich gang amel ufe einsami Landstrass, wo der Motorelärm niemerds stört, wos übersichtlich isch und wos e langi Grade het. Dert luegi, öb vo hinde keine chunnt, denn beschleunige y uf ca. 120 km/h, lueg namal in Rückspiegel, und wenn freyi Bahn isch, gangi in voll d'Yyse. Das ganze wiederholi denn, bis d'Brämse Fading zeige. Bi miner Harley passiert das relativ schnäll, mit eme moderne Supersportler chasch das stundelang mache, bis d'Brämsflüssigkeit aafangt choche (gseht no spektakulär us, muesch allerdings nochhär go wächsle). Wänn der das nöd gwoned bisch, isches au e konditionelli Froog, Vollbrämsige sind körperlich UND geischtig aasträngend (Brämsbeschleunigungschräft, Konzentration, Aaspannig, Angscht voreme Sturz, etc.)

An alli wos betrifft: Ihr händ absolut Rächt, wenn ihr saaged, im Notfall gälted anderi Gsetz. Wenn me verschrickt, tendiert me derue, zfescht oder z'schnäll am Hebel z'zieh und padauz, schliiirrrrrrrgggg.... Isch mir sälber amene Enduro-Geländetraining so ergange, drum waiss is. Doo dergeege hilft nur gaaaaanz viel Routine oder es ABS.

Und sones ABS isch au das für was ICH mich entschiede ha für mi nöggschte Töff, das stoht mol sicher fescht. Ich bi so ziemlich alles Probe gfahre mit däm System wo's zer Zyt ufem Märt git. Um usezfinde, was es würkli taugt, hani miteme Töfflerkooleg es Brämsduell gmacht (weiter unten) und ich mues saage, das isch es super Gfühl, wänn der kaini Sorge me muesch mache wägeneme blockierende Vorderredli.

Es isch mir vorallem ufgfalle, wie sehr das min Blick :ugly4: frei macht für anderi Sache, z.Bsp. Uswychmanöver, wytere Streckeverlauf. Ich fahr viel vorusschauender, wili d'Brämszone nümme so gnau überprüefemues uf Belagsqualität, Verschmutzige, Bitume, etc und wänns chalt isch und mir d'Tööpe abfrüüred, mues ich mir um d'Brämsdosierig au kai Sorge me mache. Wenn me de Winter durefahrt, isch das halt es Argumänt.

Die System verzögeret hützutag so an die 8.5 - 10.5 m/s2, also öppe plus minus Fallbeschkleunigung. Das isch zwar nur öbbe 80 - 95% (je nach Modäll und System halt) vo däm was möglich wär unter optimale Bedingige. Also eme Töff mit glychmässiger Gwichtsverteilig. Und warm gfahrene Pneu. Uf trochener Stross. Und guetem Belag. Ihr merkeds scho, e huufe Bedingige wo ebe nid immer gää sind. Und denn chunnt ebe der Schreck derzue. Der TS cha dervo es Liedli singe, gäll?!

Uf der Rennstrecki, dört chames ja abschalte (BMW R1200S, K1200R + S, Ducati ST3). Aber wieviel % vo mine Kilometer machi uf der Rennstrecki? Dasch denn halt individuell.

S' tolleste draa find ich das Gfühl vo Unbeschwärtheit. Dasch soo der Hit für mich gsii, das is zer Zyt gwaltig vermisse.

Üebe muesch allerdings au dermit, damit waisch wie's tuet, wänns tuet. Und wie tuets? Es pulsiert im Hebel. Es ratteret mängisch fasch unhörbar (Honda VFR 800), mängisch lüüter. Und brämse tuets natüürli au und wie guet oder schlächt dases brämst, das hani denn wölle wüsse und bi gegen en Kolleg uf der R6 aaträtte zumene Brämsduell mit ere gmietete BMW F650 Scarver. Dasch System isch vo BOSCH und ais vo de effiziäntischte zer Zyt ufem Markt. Bereifig uf der Scarver isch Michelin Pilot Sport gsii. Usgangsgschindigkeit 100 km/h näbedenander härfaare und bim lüüchtige Chriidestrich quer über der Strass voll in d'Yyse. Resultat?

- Ufem Trochene hämmer öis nüd gschänkt, d'Unterschied wos gää het lieged in der Mässtoleranz vo öisem "aifache" Teschtverfahre. Was aber sicher z'beobachte gsi isch: D' Yamaha-Triibendi Kolleg hett miteme abhebende Hinterrad und em drohende Überschlag kämpft, bi mir isches ziemlich unspektakulär gsi. Es bocked und ratteret halt e chli, do gwöhnsch di draa. Hett är e Buell gfahre, wärs wohrschiinlicher tüütlicher usechoo, will die jo schnäller ufs Vorderredli gönd als en R6.

- Im Nasse hett sin erschte Versuech ums Hoor miteme Sturz g'ändet. (Uff, tief düreschnuufe!) Im druffolgende nächschte Versuech isch är denn eso vorsichtig gsii, das em mehr als 10 Meter abgnoo ha. Das heisst also är isch öbbe no 50 km/h gfahre, won ich scho gstande bi. Me stell sich en Ufprall ufe stehendi Autokolonne vor....

- Ich hätt no en Eimer Splitt ghaa, aber do hett är denn ändgültig kapituliert.

Ihr chöned jetz säge, das sig en unfaire Vergliich. Stimmt. Kai Mesch cha 10x pro Sekunde der Brämsdruck optimal aapasse, öises Hirni isch aifach z'lahm daderzue. Und dä Typ im Bürgerchefig, wo dir s'Loch zue macht bim Linksabbiege isch au nid fair zu dir. Was blibt übrig? Es sichers, entspannts Gfühl und es Räschtrisiko, wo mir Töffahrer alli täglich trääged und wo's Töfffahre ja au interessant macht, wie der "maini" so schön formuliert het. Wänn dr Abstand zum Vordermaa z'gring isch, wänn d'Schrääglaag z'gross isch, wänns in der Kurve Öl het denn nützt au es ABS nüüt. Suscht chömmer ja grad uf vier Redli umstyyge. Es isch au mit ABS no gföhrlech gnueg, aber d'Schreeglaag isch zum Glück immer no die gliichi und d'Beschleunigung au und (wäm's wichtig isch) der Topspeed au.

(sorry, kleiner Seitenhieb)

Frage: Wär vo euch het Erfahrig mit aim oder mehrere ABS-Töffe im Regelbereich? Es würd mi interessiere, euri Ydrück und Vergliich vo de ainzelne Syschtem z'ghööre.

Zitat

Original von Passani: TT, bi bis jetzt ersch en BMW mit eme ABS gfahre, und bi sehr überrascht gsi, wie schnell und sicher das me uf aphalt staht. jedoch stoppie unmöglich.

@Passani: Du hesch Rächt, s'Vergnüege vo lange steile Stoppies hesch nümme so oft. Stoppies passiere bi de ABS Bikes nur im chliine Rahme, ca. bis 10cm über die ganzi Brämsstrecki verteilt. Es isch also e chli es Hüpfe hinde. Deftigi Stoppies passiere derfür eher unbeabsichtigt, zum Byspiel bi de ABS I und II vo de Boxer-BMW nachem Überfahre vo Dooledeckel, derfür denn ziemlich plötzlich. No schlimmer isches bi der Ducati ST4s. Wenn de do der Brämsgriff nid blitzsdchnäll lockerisch, gasch über der Länker. Die allermeischte ABS-Bikes lönd erscht ganz am Ändi vo der Brämsig en deftige Stoppie zue, zum Byspiel d'1200er Suzuki Bandit. D'BMW F650 Scarver hingäge stiigt wunderschön ufs Vorderrad wänns bergab goht oder du en Passagier derbyy hesch. Die het nämlich kain Überschlagsschutz iibauet. Das muesch der aifach bewusst sy, wänn der Pass durab fahrsch. Aber bimene Bike ohni ABS isch das jo au nid andersch.

D'Boxer BMW händ do en Riese-Noochtail und es würd mi Wunder nää, öb du das au bemerkt hesch. Wägem Überschlagsschutz im Paralever am Hinterredli chas passiere, dass wänn du im Gefälle brämsisch, speziell uf holprige Strasse, dass d'Vorderbräms ziemlich lang uufmacht, will der Sensor am Hinterrad en drohende Überschlag vermuetet. Du verschricksch denn ziemlich, will de praktisch unbrämst uf d'Kurve zuefliegsch. Ich ha das ainisch erläbt. Im däm Momänt hani ächt en Todesangscht gha, will hinter dere Kurve hets nume no Böim ghaa und ich ha mi scho gseeh Holz frässe. Du fühlsch di sowas vo hilflos in der Situation; de ziehsch am Hebel wie blöd aber es passiert NÜÜT!!! *härzbarragge* . Es hett dänn no glanget will i no Resärve ghaa ha und das Bike (R1200ST) relativ viel Schreeglagefreiheit, und will kai Geegeverchehr choo isch. Sithär sind jedefalls die Boxer BMWs für mich tabu, bis sy dä Überschlagssensor äntwäder usbauet oder verbesseret händ.

Zitat

Original von Passani: mit dr buell hani vollbremsige bis 150 güebt, chunt eifach immer z hinderrad ufe.

Ich ha damals Folgendes mit minere 125er TZR usegfunde: Wänn es Biike mit 50 ufs Vorderredli gaht, gahts au mit 120 ufs Vorderredli. D'Physik isch die glyychi. Vo däm här chasch di druf verlaah, dass dini Buell bi allne Tempi s'Hinterteil wird lüpfe, wänn de nöd z'ruckartig am Hebel ziesch.

Bi scho e Buell Lightning CityX XB 9 gfahre. Die gönd tatsächlich uf Vorderredli wie nüt. Das liegt an der extrem churze Geometrie mit steiler Gable und hohem Schwärpunkt, wo bewirkt, dass de halt nid GANZ eso starch chasch brämse. Het derfür der Vorteil, dass s'Vorderredli praktisch nie blockiert, was sehr viel Sicherheit vermittlet. Und dasch doch au schön! Zwöi Sache sind mer ufgfalle bim Buell brämse und bi gspannt, öb du das Phänomen bi dir au hesch:

- Sy zieht liecht nach rächts bim Brämse. Ich dänke dasch wäge dere 1-syytig verlegte Riise-Brämsschybe.
- Wänn hinde blockiersch tendierts relativ schnäll zum usbräche wägenem churze Radstand.

I ha mer das überlegt, öbi söll e Buell chaufe, anstatt ere Harley, aber dä Rahme isch mer aifach z'exponiert. Ich ha aine gseh, wos glitzt het, dä Rahme isch am Arsch. Dä armi Tÿp mues en neue Rahme chaufe, alles uusbaue, alles wieder yybaue, nur wägeme Stürzli. Was das choschtet?! Säg, hesch du nid e chli Angscht um dy Rahme, wenn de gahsch go frääse? Mich hets letschtlich ebe dervo abghalte e Buell z'chaufe.

Stimmt, die 1000er Fazer esch e chli eklig. Ligt an der Gwichtsverteilig, am gstreckte Gablewinkel und am Übergwicht vo däm Modäll. Isch halt bewusst fürs flotte Toure gmacht und nid zum Heize. Die neui 600er stigt problemlos. Mängisch hälfe do härteri Gablefädere und e Heckaahebig um es paar cm (Fäderbei verstellbar, oder Unterlagsschiibli drunter). Du muesch s'Gwicht irgendwie nach vorne bringe, au mit diner Sitzposition, zum Byspiel niedrigere Länker. Aber ebe, denn chasch langsam en R1 chaufe und en Superbikelänker druuf tue. Sportpneu hesch druf? ABS wär halt no guet für dini Fazer.